‘നടി വിദ്യ ബാലനോട് നന്ദി’; 3 മാസത്തിൽ 9 കിലോ കുറച്ച് ജ്യോതിക

മൂന്ന് മാസത്തിനിടെ 9 കിലോ ഭാരം കുറച്ചതിന്റെ അനുഭവം പങ്കുവെച്ച് നടി ജ്യോതിക. ശരീരഭാരം കുറയ്ക്കാൻ കഠിനമായ വ്യായാമങ്ങളും പലതരത്തിലുള്ള ഡയറ്റുകളും പരീക്ഷിച്ചിരുന്നെങ്കിലും പ്രതീക്ഷിച്ച ഫലം ലഭിച്ചിരുന്നില്ലെന്ന് താരം പറയുന്നു. പിന്നീട് നടി വിദ്യ ബാലന്റെ ഫിറ്റ്നസ് മാറ്റത്തിൽ നിന്ന് പ്രചോദനം ഉൾക്കൊണ്ട് പുതിയ രീതിയിലുള്ള ഭക്ഷണക്രമവും പരിശീലനവും പിന്തുടർന്നതോടെയാണ് കാര്യമായ മാറ്റമുണ്ടായതെന്നും ജ്യോതിക വ്യക്തമാക്കി.
വിദ്യ ബാലനാണ് തന്റെ ഫിറ്റ്നസ് യാത്രയിൽ പ്രധാന പ്രചോദനമായതെന്ന് ജ്യോതിക പറഞ്ഞു. വിദ്യയിലൂടെ പരിചയപ്പെട്ട ചെന്നൈ ആസ്ഥാനമായുള്ള അമുറ ഹെൽത്തിന്റെ പോഷകാഹാര വിദഗ്ധരുടെയും പരിശീലകരുടെയും നിർദേശങ്ങളാണ് പിന്നീട് ജ്യോതിക പിന്തുടർന്നത്. ശരീരഭാരം കുറയ്ക്കുന്നതിൽ ഭക്ഷണം ഒഴിവാക്കുകയോ കർശനമായ നിയന്ത്രണങ്ങൾ ഏർപ്പെടുത്തുകയോ ചെയ്യുന്നതിനേക്കാൾ ശരീരത്തിന് ആവശ്യമായ പോഷകങ്ങൾ ശരിയായ രീതിയിൽ ലഭ്യമാക്കുന്നതിനാണ് പ്രാധാന്യം നൽകിയതെന്ന് താരം പറയുന്നു.

തന്റെ മുൻകാല ശ്രമങ്ങളെക്കുറിച്ചും ജ്യോതിക തുറന്നുപറഞ്ഞു. കഠിനമായ വർക്കൗട്ടുകൾ, കർശനമായ ഭക്ഷണക്രമം, ഇടവിട്ടുള്ള ഉപവാസം തുടങ്ങിയ രീതികൾ പരീക്ഷിച്ചിട്ടും ഭാരം കുറയ്ക്കാൻ സാധിച്ചിരുന്നില്ല. പുതിയ രീതിയിൽ ഭക്ഷണക്രമം ക്രമീകരിച്ചതോടെ ദഹനം, ശരീരത്തിലെ വീക്കം ഉണ്ടാക്കാൻ സാധ്യതയുള്ള ഭക്ഷണങ്ങൾ, പോഷകങ്ങളുടെ ബാലൻസ് എന്നിവയെക്കുറിച്ച് കൂടുതൽ മനസ്സിലാക്കാൻ കഴിഞ്ഞുവെന്നും താരം പറഞ്ഞു.
ഭക്ഷണക്രമത്തിലെ മാറ്റത്തിനൊപ്പം സ്ട്രെങ്ത് ട്രെയിനിങ്ങിനും ജ്യോതിക വലിയ പ്രാധാന്യം നൽകി. ഭാരം കുറയ്ക്കുന്നതിനൊപ്പം ശരീരത്തിന്റെ ശക്തിയും പേശികളുടെ ആരോഗ്യവും നിലനിർത്താൻ വെയ്റ്റ് ട്രെയിനിങ് സഹായിക്കുമെന്ന് താരം ചൂണ്ടിക്കാട്ടി. പ്രത്യേകിച്ച് സ്ത്രീകൾക്ക് പ്രായം കൂടുന്നതിനനുസരിച്ച് ശരീരത്തിന്റെ ശക്തി നിലനിർത്തുന്നത് പ്രധാനമാണെന്നും ജ്യോതിക അഭിപ്രായപ്പെട്ടു.

ശരീരഭാരം കുറയുന്നത് മാത്രമല്ല ആരോഗ്യകരമായ ജീവിതശൈലിയാണ് പ്രധാനമെന്നും ജ്യോതിക പറയുന്നു. ഭക്ഷണക്രമം, വ്യായാമം, മാനസികാരോഗ്യം, ശരീരത്തോടുള്ള കരുതൽ എന്നിവയെല്ലാം ഒരുമിച്ച് പരിഗണിക്കേണ്ടതുണ്ടെന്നാണ് താരത്തിന്റെ നിലപാട്.
വിദ്യ ബാലനും നേരത്തെ തന്റെ ഭാരം കുറച്ചതിനു പിന്നിലെ അനുഭവങ്ങൾ പങ്കുവെച്ചിരുന്നു. പല ഡയറ്റുകളും വ്യായാമങ്ങളും പരീക്ഷിച്ചിട്ടും ശരീരഭാരം കുറയുകയും പിന്നീട് വീണ്ടും കൂടുകയും ചെയ്തിരുന്നുവെന്നും പിന്നീട് ചെന്നൈയിലെ പോഷകാഹാര വിദഗ്ധരുടെ സഹായത്തോടെ ഭക്ഷണക്രമത്തിൽ മാറ്റം വരുത്തിയതോടെയാണ് കാര്യമായ പുരോഗതി ഉണ്ടായതെന്നും വിദ്യ പറഞ്ഞിരുന്നു.

ജ്യോതികയുടെ അനുഭവവും ഇതോടെ ശ്രദ്ധ നേടുകയാണ്. മൂന്ന് മാസത്തിനിടെ 9 കിലോ കുറച്ചത് തന്റെ ആരോഗ്യത്തിലും ഊർജത്തിലും ആത്മവിശ്വാസത്തിലും മാറ്റമുണ്ടാക്കിയതായി താരം പറയുന്നു. ശരീരഭാരം കുറയ്ക്കുന്നതിനേക്കാൾ ആരോഗ്യകരമായ ജീവിതശൈലി രൂപപ്പെടുത്തുന്നതിനാണ് പ്രാധാന്യം നൽകേണ്ടതെന്ന സന്ദേശമാണ് ജ്യോതികയുടെ അനുഭവം നൽകുന്നത്.
കുറിപ്പ്: ഒരാൾക്ക് ഫലപ്രദമായ ഭക്ഷണക്രമമോ വ്യായാമരീതിയോ മറ്റൊരാൾക്കും അതേ രീതിയിൽ അനുയോജ്യമാകണമെന്നില്ല. വ്യക്തിഗത ആരോഗ്യസ്ഥിതിക്ക് അനുസരിച്ച് വിദഗ്ധരുടെ നിർദേശം തേടുന്നതാണ് ഉചിതം.